खरी खरी - 145 : कौस जमान ऐगो
ब्या में बरेतिय लोग सिद
ब्योलि कै घर औंनी,
खै-पी बेर लिफाफ
ब्यौला बाप कैं पकडूंनी,
कै दगै बात करण क
टैम न्हैति बतूनीं,
जैमाव डाउण है
पैलिकै खसिकि औंनी,
बरयात कूण में सिरफ
ब्यौल क परिवार वां रैगो,
कौस जमान देखौ
कौस जमान ऐगो ।
ब्या क लगन कि
परवा क्वे नि करन,
वीडियो फोटो वलां क
सब जाग हुकम चलूं,
खिसाई बामण चुपचाप
टकटकी लगै भैरां,
कभतै झपकि ल्युछ
कभतै आंख मिनूं,
फोटोग्राफी भलि है गेई
समझो भल ब्या हैगो,
कौस जमान देखौ
कौस जमान ऐगो ।
पूरन चन्द्र काण्डपाल
19.12. 2017
No comments:
Post a Comment