AApani bhasha : आपणि भाषा

मीठी मीठी -  100 : आपणि भाषा कि बात नानतिनों क दगाड़ ।

    बेई 08 अप्रैल 2018 हुणि DPMI (दिल्ली पैरामेडिकल मैनेजमेंट इंस्टिट्यूट) न्यू अशोक नगर नई दिल्ली में यौ साल ननां कि गर्मियों कि छुट्टी क दौरान उनुकैं आपणि भाषा कुमाउनी -गढ़वलि सिखूण क बार में एक बैठक हैछ ।  यौ तिसौर साल छ जब ननां कैं हमरि भाषा सिखाई जालि । यूं कक्षाओं क आयोजक उत्तराखंड लोकभाषा साहित्य मंच दिल्ली क संयोजक  श्री दिनेश ध्यानी ज्यू ल बता कि यौ साल द्वि दर्जन है ज्यादै जगां पर कक्षा आयोजन ह्वल जैक नाम उनार पास पंजीकृत हैगो । ( संपर्क सूत्र - 9811777006, 9818342205, 9873177564, 9868372933, 9873656112, 9873854690, 9871388815 )

      यूं कक्षाओं क प्रायोजक डा. विनोद बछेती ज्यू (निदेशक DPMI ) समेत कएक संस्थाओं क प्रतिनिधि छीं जैक समन्वयन उत्तराखंड एकता मंच दिल्ली द्वारा करी जाल । यौ साल कक्षा 20 मई बटि 05 अगस्त 2018 तक प्रत्येक इतवार (12 इतवार ) रोजाना रत्तै 10 बजी बटि 12 बजी तक चलली । पाठ्यक्रम औऱ शिक्षकों क बार में 20 मई है पैली एक बैठक क आयोजन करी जाल तबै अन्य जानकारी लै दिई जालि । हमरि भाषा कैं सिंचित करण क लिजी सबै भाषाप्रेमियों हैं अनुरोध छ कि यूं कक्षाओं क आपण - आपण क्षेत्र में  आयोजन करण में तन -मन -धन ल सहयोग करो तबै हमरि भाषा ज्यौंन रौलि । 

पूरन चन्द्र काण्डपाल
09.04.2018