Korona thamani chaini : कोरोना थामनी चैनी

खरी खरी - 634 : कोरोना में  मजूरों कि रोवारोव थामणी चैनी

     (आज लौकडाउनक  62/68वां दिन छ । संक्रामक रोग कोरोना पुर विश्व में बढ़ते जां रौ । आज तली विश्व में कोरोना संक्रमित/मृत संख्या 54.97+/3.46+ लाख और देश में य ई  संख्या 1.38 लाख+/3.9+ हजार छ  । लौकडाउन क नियम मानो  और कोरोना है बचो ।)

मसमसै बेर क्ये नि हुन
बेझिझक गिच खोलणी चैनी,
अटकि रौछ बाट में जो दव
हिम्मतल उकैं फोड़णी चैनी ।

अन्यार अन्यार कै बेर
उज्याव नि हुन,
अन्यार में  एक मस्याव
जगूणी चैनी ।
मसमसै..

क्ये दुखै कि बात जरूर हुनलि
जो डड़ाडड़ पड़ि रै,
रुणी कैं एक आऊं
कुतकुतैलि लगूणी चैनी ।
मसमसै बेर...

लौकडाउनक य दौर में
कुछ बेसउरि देह दूरी नि धरैं राय
नाक -गिच पर मास्क नि लगूं राय
यूं दुर्योधनों कैं पकड़ि बेर
महाव लगूणी चैनी ...

अच्याल मजूर मजबूरी में गौं जां रईं
हिटन-हिटनै उनार खुटां में छाव पड़ि गईं
भुख -लाचार छीं बिचार डाड़ मारैं रई
यूं लाचारों कि रोवारोव कैं
थामणी चैनी...
मसमसैर बेर के नि हुन...

पूरन चन्द्र कांडपाल
25.05.2020