Korona kain haraide : कोराना कैं हरै दे ।

खरी खरी - 621 : कोरोना कैं हरै दे ।

(आज कोरोना लौकडाउनक 40/40उं दिन छ । यूं 40 दिनों कि सूक्ष्म गाथा कविता ' कोरोना कैं हरै दे ' में यां प्रस्तुत छ । आजि लौकडाउन ख़तम नि है रय, तिसरि बार शुरु हैगो । आज दुनिया में संक्रमित संख्या 34.83 लाख और मृतक संख्या 2.44 लाख हैगे जबकि भारत में संक्रमित संख्या 39 हजार है ज्यादा और मृतक संख्या तेर सौ है ज्यादा हैगे । घर में रया, भ्यार झन अया , तबै देश जितल, हारल कोरोना । )

चीन बै वायरस कोराना आय,
येल दुनिया कैं हिलै दे ।

तीस जनवरी द्वि हजार बीस
भारत में है पैलि तफ्तीश,
पुर देश में मची हलचल
फ़ैल कोरोना चारों दिश ।
हाय रै! चीना त्वील दुनिय कैं
य संताप किलै दे ? चीन...

पैल लौकडाउन ईक्कीस दिनक
फिर दुसर हय उन्नीस दिनक,
नि थमी बीमारी फिर लगायौ
झट तिसरि बार चौद दिनक।
चालीस दिनक लौकडाउनल
पुर देश कैं वसिलै दे । चीन...

लौकडाउन में यसि आफत
जो जां छीं वांईं रै गोयौ,
भुक मरण कि नौबत ऐ गेइ
काम धंध सब छुटि गोयौ।
हाहाकारल मजदूरों कैं
डरै बेर तिलमिलै दे । चीन...

सरकारी ऑडर ऐ गया
घर में आपण बंद रया,
जरूरी काम पड़ल जब
तबै खुट भ्यार ल्याया ।
देह दूरीक ख्याल करिया
मास्क महाव लगै दे । चीन...

मुफ्त राशन मुफ्त भोजन
सरकारों लै लगायौ जतन,
लैन भौत लाम है गा छी
कैकणी मिलौ कै नि मिलन ।
दानवीरों लै दान दी बेर
गरीबों कैं खाण खिलै दे । चीन...

एक तरफ बीमारी दहशत
दुसरि तरफ बिगड़ी बोल,
क्वे करैं रौछी देश सेवा
क्वे छणकैं रौछी जहर घोल।
अफवाहों लै कोरोना पर
रंग मजहबी चढै दे । चीन...

स्वास्थ्य कर्मी पुलिस डाक्टर
य बीच बनि गाय भगवान,
थाइ बजै बेर दी जगै बेर
देश लै कर इनर आहवान।
कर्मवीरों लै जोखिम उठै
कर्तव्य आपण निभै दे । चीन...

तीस अप्रैल तक पुरि दुनिय में
तैंतीस लाख बीमार है गाय,
साव द्वि लाख है ज्यादै रोगी
कोरोनाल आपण गास बनाय।
अमरिका इटली स्पेन फ़्रांस
जर्मनी इंग्लैंड हिलै दे । चीन...

हमार देशम य दौरान में
पैंतीस हजार बीमार हईं,
इग्यार सौ है ज्यादै बीमार
क्रूर कोरानाक शिकार हईं।
देशल फिर लै हिम्मत नि हारि
कोरोना मिलि बेर हरै दे। चीन...

पूरन चन्द्र कांडपाल
03.05.2020