बिरखांत -273 : बैसि में ल्हे बद्यल
(ये है पैल बिरखांत -272, 11.07.2019 संदर्भ, उत्तराखंड में बैसि )
बैसिक बार में एक दुसर गौं कि एक दुसरी कहानि छ | यां बैसि देखूं हूँ रोजाना द्वि ज्वान लौंड, हरकू- खड़कू औंछीं | यूं आपस में एक दुसरै कि जलंग करछी और एक दुसरै कैं निच्च देखूण कि ताक में रौंछी | इग्यारी ( बैसि क 11 ऊं रात ) हुणि खड़कू धुणी में नाचि गो | वीक नाचण देखि हरकू लै ताव में ऐ बेर बदन हल्कों फैगो | खड़कूवैल हरकू उज्यां आँख ताणी और हरकू लै नाचण फैगो | खड़कू नाचन- नाचनै हरकूवैक नजीक गो और उकें द्वि मुक्क ज्येड़ि दीं | हरकू कैं लै गुस्स आ और वील खड़कू कैं मुक्क मारण चा | यतु में दासल जोरल आवाज लगै दी, “होश से, बिना गुरु अन्यार रात किलै है रै ?” यतुमें हरकूवैल खड़कू कैं छोड़ि दे |
दुसार दिन बैसि कि जागर में हरकू धोति पैरि बेर घरै बै नाचणक मूड में आछ | उकें धुणी में खड़कू नजर नि आय | जब खड़कू कैं पत् चलौ कि हरकू धोति पैरि बेर ऐ रौ, उ लै फटाफट धोति पैरि बेर चढ़मड़ानै धुणी में पुजि गो | जस्सै दासल ढोल में पट्टाक मारौ, हरकू जोरैल नाचौ और उपन जस तिड़ी बेर खड़कू पर झपटि पड़ौ | द्विनू कि गुर्दाफानी कैं बैसिक मुंड लै चाइए रै गाय और उनर दयाप्त लै घेरी गोय | खड़कू- हरकू लड़न–लड़नै धुणी है भ्यार न्है गाय | दासल गाव में बै ढोल निकाइ दे | कतु झणीयांल उनुकें अछुड़ा पर आखिर में पटवारी बलूण पड़ौ | आदू रात कै पटवारी क सामणी पंचनाम करि बेर केश रफादफा करौ | बाईस दिन बाद भनार हौछ पर हरकू–खड़कूवक मनमुटाव ख़तम नि हौय और आज तक लै मुखबलौ न्हैति | आब यूं नाचण लै भुलि गईं | झाणी कथां गो उनर दयाप्त घ्वड़ कैं छोड़ि बेर |
बैसि करी डंगरियाँ कि मांग यां ज्यादै छ | सौ में एकाद कैं छोड़ि बेर सब डंगरिय शिकार, शराब, बीड़ी, सिगरट, तमाकु, खैनी, अत्तर, गांज आदिक सेवन करनी | इनर आचार, विचार और व्यवहार लै रुढ़िवाद और संकीर्णताल भरी हुंछ | लोगों कैं इनर यूं चीजोंक सेवन करण में नक् लै नि लागन और न यैकैं यूं ऐब मानन | पहाड़ बै नौकरी कि ढूंढ में भ्यार आई लोग जब लै पहाड़ जानी, इनार यूं हरकतों देखि चुप रौनी | क्वे लै गिच नि खोलन | बुरि चीज हूं बुरि छ कूण कि हिम्मत वां जाते ही लापता है जींछ |
काश ! हमार देवभूमिक लोगों कैं य बात समझ ऐ जानि कि य बैसि, जागर, डंगरी, दास, भूत, मसाण हमार दिमाग में छाई अन्यार कि उपज छ, तो लोगों क अन्धविश्वास है बेर पिंड छुटि जान | यांक स्यैणी विरोधक नाम पर गिच लै नि खोलि सकन | पढी- लेखी स्यैणी लै चुप रौनी | जब सबूंल चुपै रौण सिखि हैछ त देवभूमिक भल कसिक है सकूं ? अन्धविश्वासक अन्यार कैं भजाउण क लिजी एक नै एक दिन त एक छिलुक जगूण पड़ल | कुवक मिनुक बनि बेर ज्यौन राण हैबेर बेबखत कि मौत भलि छ |
बैसि क बार में मंथन जरूरी छ | म्यर विचार पर जो सहमत न्हैति ऊँ नक झन मानिया | शराबि दास-डंगरियोंक अणगणत किस्स राज्य में फुफै रईं | हमूल राम ज्यू और कृष्ण ज्यूक दिखाई बाट छोडि बेर आपूं कैं अन्धविश्वास कि स्येलि पर बादि रौछ | हाम छन अखां काण बनि गोयूं | म्यार बात पर विश्वास करण कि लै जरवत न्हैति | खुद परखिया, देखिया पै आपण जज आफी बनि बेर सही फैसाल करिया | साधुवाद | जयहिन्द ।
पूरन चन्द्र काण्डपाल
19.07.2019
No comments:
Post a Comment