स्मृति - 590 : मथुरादत्त मठपाल, कुमाउनी भाषाक एक समर्पित लेखक छी
मथुरादत्त मठपाल ज्यू दगै हालों में म्येरि भेट 18 बटि 20 अक्टूबर 2018 तक लगातार तीन दिन हैछ जब य दौरान रामनगर जिला नैनताल में तीन दिनी कुमाउनी - गढ़वाली भाषा सम्मेलन हौछ । य सम्मेलन में कुमाउनी और गढ़वालीक कएक रचनाकारोंल हमरि भाषा सम्बन्धी कएक मुद्दों पर चर्चा करी । य सम्मेलनक मुख्य विचार बिंदु छी भाषाक मानकीकरण, व्यवहारीकरण और प्रसार । सबै वक्ताओंल यूं मुद्दों पर विस्तृत वार्ता करी और आपणि भाषा कुमाउनी -गढ़वालि कैं इस्कूलों में पढूण, यकैं रोजगार दगै जोड़ण, पाठ्क्रम बनूंण और साहित्य लेखण पर जोर दे ।
य तीन दिनी भाषा सम्मेलन में कुमाउनी और गढ़वालीक कएक साहित्यकारोंल आपण विचार धरीं जनूं मुख्य छी 'दुदबोलिक' संपादक श्री मथुरादत्त मठपाल ( रामनगर), जगदीश चन्द्र जोशी (हलद्वाणी), पूरन चन्द्र काण्डपाल (दिल्ली), कैलाश चन्द्र लोहनी, प्रोफेसर शेखर पाठक ('पहाड़' नैनताल), डॉ योगम्बर सिंह बर्त्वाल, डॉ नागेंद्र ध्यानी (देहरादून), दामोदर जोशी 'देवांशु' ('कुमगढ़' क संपादक कठगोदाम ), डॉ प्रयागदत्त जोशी (हलद्वाणी), कृपाल सिंह शीला (भिकियासैंण बासोट ) ।
मूल रूपल नौला गौं (भिकियासैंण) रौणी, तीन बार एम.ए. और बी.टीं.शिक्षित मथुरा दत्त मठपाल ज्यूक जन्म 29 जून 1941 हुणि हौछ। मठपालज्यू दगाड़ म्येरि भेट पैली लै कतू ता है । अल्माड़ राष्ट्रीय कुमाउनी भाषा सम्मेलन में मील उनर हमरि भाषा क बार में व्याख्यान लै सुणौ । देहरादून और अल्माड़ में लै उनू दगै भेट है । एक ता अल्माड़ बै हलद्वाणि तक हाम टैक्सी में दगडै आयूँ । य दौरान मील मठपालज्यू कैं भौत नजदीक बै देखौ औऱ सुणौ । कमजोर शरीर होते हुए 80 वर्षकि उमर में लै उं रात-दिन कुमाउनी साहित्य सृजन में लागि रौंछी । मठपाल ज्यू 33 वर्ष तक नौकरी करण बाद 1997 विनायक इंटर कालेज बै एक वरिष्ठ अध्यापक बतौर सेवानिवृत हईं । उनार कएक किताब छपणक लिजी तैयार लै छीं जो आर्थिक तंगींक वजैल छपि नि राय ।
मठपाल ज्यूक लेखन संसार भौत ठुल छ । उनूल 'आङ्ग-आङ्ग चिलैल हैगो', 'पै मैं क्यापक क्याप कै भैटुनू', 'मनख-सतसई', 'फिर प्योलि हँसैं' (अनेक किस्मसक छंद-2006) , 'रामनाम भौत ठुल', 'था मेरा घर भी यहीं कहीं' ( हिमवंत कवि चन्द्रकुँवर बर्त्वाल ज्यूकि अस्सी हिंदी कविताओंक कुमाउनी अनवार -2013), 'अनपढ़ी' ( शेरदा 'अनपढ़' कि एक दर्जन कुमाउनी कविताओंक हिंदी शब्दानुबाद- 1986 ), 'हम पीर लुकाते रहे' (सुप्रसिद्ध कवि और गायक हीरा सिंह राणा कि सत्तर (17) कविताओंक हिंदी गद्यानुवाद - 1989 ) और 'इन प्राणों में पीड़ा जागी' ( कवि-पत्रकार-समाजवादी विचारक- श्रम विधि विशेषज्ञ- स्वतंत्रता सेनानी- द्वि ता विधायक रई महान समाजसेवी 'फक्कड़' विधायक नामल चर्चित युगपुरुष स्व.रामदत्त जोशी ( 1929-2002 ) कि संक्षिप्त जीवन गाथा -2016 ) ।
मठपाल ज्यूक उक्त किताब लेखण है अलावा एक अद्भुत कर्म छ 'दुदबोलि' (कुमाउनी चिनाण - पछ्याण कैं रेखांकित करनेर वार्षिक उपक्रम ) पत्रिकाक सम्पादन । 'दुदबोलि' क' वर्ष 2013 तली आठ अंक प्रकाशित हैगीं, इनुमें 4 अंक (2007, 2011, 2012 और 2013 ) म्यर पास मौजूद छीं ।
पिछाड़ि साल 2020 में उनर कुमाउनीकि अस्सी सालों कि कथा जात्रा' कौ सुआ काथ कौ ' प्रकाशित हौछ जमें 100 साहित्यकारोंक लेखी कहानि संग्रहित छीं। सामाजिक कार्यकर्ता श्री सुरेन्द्र सिंह हाल्सी ज्यूक माध्यमल य किताब म्यार पास पुजी । वर्ष 2016 में उनुकैं साहित्य अकादमी भाषा सम्मानल सुशोभित करिगो । बिस्तर में बीमारीकि हालत में लै मरि मरि तराण लगै बेर कलम पकणि आंखरों कि माव बनूणी मठपाल ज्यूल 9 मई 2021 हुणि आपण निवास पंपापुर, रामनगर (उत्तराखंड) में रत्तै पर आंखिरी सांस ली । दिलाक गैराइयों बै य संत कलमकार कैं विनम्र श्रद्धांजलि।
पूरन चन्द्र कांडपाल
10.05.2021
No comments:
Post a Comment