Hamari bhasha sikho : हमरि भाषा सिखों

मीठी मीठी - 129 : हमरि भाषा सिखो

     दिल्ली में ग्रीष्मकालीन  कुमाउनी- गढ़वाली भाषा सिख़ूण कि आज 01 जुलाई 2018 हुणि सातूं क्लास छी । दिल्ली में उत्तराखंड लोकभाषा साहित्य मंच दिल्ली और DPMI, UEMD सहित कएक संस्थाओंक सहयोगल यूं भाषा सिखलाई कक्षा कएक जगां पर चलैं रईं । आज DPMI में म्यार दगाड़ दुसर अध्यापक चंदन प्रेमी ज्यू छी । ननां कैं उनूल गढ़वाली और मील कुमाउनी सिखै ।

     20 मई 2018 बटि 05 अगस्त 2018 तक यूं कक्षा प्रत्येक ऐतवार हुणि रत्तै 10 बटि 12 बजी तक   आयोजित करी जानी । उद्देश्य छ कि हमरि भावी पीढ़ी कैं आपणि भाषा सिखाई जो । सब मितुरों हैं निवेदन छ कि आपण ननां कैं भलेही क्वे लै भाषा सिखाओ पर उनू दगै आपणि मातृभाषा में जरूर बात करो । आपणि इज और आपणि मातृभाषा निभुलण चैनि । हमरि मातृभाषा हमरि पछ्याण छ । जब हाम सब कोशिश करुल तबै हमरि भाषा संविधानक आठूँ अनुसूची में शामिल ह्वलि ।

पूरन चन्द्र काण्डपाल
02.07.2018