खरी खरी - 273 : मैंस पीं रईं देशि शराब
मैंस पीं रईं देशि शराब
क्वे पीं रईं रम,
सैणी कूं रईं मैंसू हुणि
हाम जै के छ्यूँ कम ।
एक सैणी यसि देखि हमूल
नाम छी टिंचरी माइ,
जब नि हइ बंद शराबै दुकान
वील झट माचिस लगाइ ।
आज सैणिय शराब पींरीं
कस हय य विकास,
शराब घर घर गाड़ि पुजूँरै
मैंसोंक हैगो विनाश ।
कसि छी हमरि देवभूमि
कसि बनै दी तुमूल,
बात करी पर्यटन प्रदेशकि
बनै दीं शराबाक कूल ।
बचौ य देवभूमि कैं
हिमाल तुमुकैं धतूंरौ,
शराब करो बंद याँ
पीड़ आपणि जतूंरौ ।
पूरन चन्द्र काण्डपाल
11.07.2018
No comments:
Post a Comment