मीठी मीठी - 79 : ब्यौल ढूंढो ( कुमाउनी गीत )
‘ब्योलि ढूँढो’ गीत क बाद आब ‘ब्यौल ढूंढो’ च्येलियां कि डिमांड लै पुरि करि दिनू |
( बदलते समय के साथ लड़कियों ने भी कैसे दुल्हे की चाहत रखी है, इस गीत में उनके मन की बात है | )
दाज्यू मीहुणी ब्यौल ढूंढो गौं बै भलौ भलौ
मीकणी नि चैन दाज्यू बात मारणी च्यलौ |
उत्तराखंड बटि ढूंढो और कैं बै नि चैनौ
आपण मुलुक बै ढूंढो सीप सहूरौ नानौ
गलती साथ झन ढूंढिया क्वे फरफंडी च्यलौ | दाज्यू...
सिदसाद ब्यौल ढूनिया पढ़िया लेखीया
गबरू जवान जस हिम्मत क भरिया
डरणी मरणी झन ढूनिया, ढूनिया दिलवालौ | दाज्यू...
जांचि लिया भली भांत शराबी-कबाबी
देखि लिया गुसैल नशैल, जुवारी लबारी
झन ढूनिया गुट्कबाज, बिड़ि सिगरटौ रयलौ | दाज्यू...
यतू पतव झन ढूनिया कुकुर क पुछड़
चुसिया बानर जस नि हुण चैन मुखड़
झन ढूनिया बल्द जस कुड़कभाड़ ठयलौ | दाज्यू...
देखण चाण भल हुण चैं सनिमा जस हीरो
अकला पिछाड़ी लठ्ठ लिणियां नि हुण चैन जीरो
थम्मू जस झन ढूनिया, गूड़ कस भ्यलौ | दाज्यू...
रोबिल चटक ढूनिया जस राजकुमारा
ख़ुशी ख़ुशी जो उठै द्यो म्यार झटैक नखरा
कमै धमै सब आपणी जो म्यार हाथ द्यलौ | दाज्यू...
पूरन चन्द्र काण्डपाल
06.02.2018
No comments:
Post a Comment