मीठी मीठी - 480 : गीत, गीतकार, गायक और संगीतकार
अक्सर सांस्कृतिक मंचों/समारोहों में हम कएक कुमाउनी गीत सुणनू । गायक गीत गानी , कलाकार नाचनी और द्विए पारिश्रमिक पानी जो भलि बात छ पर लोगों कैं पत्त नि हुन कि य अमुक गीतक गीतकार, गायक और संगीतकार को छ/छी । उदाहरणक लिजी ' बेडू पाको बारामासा ' ( जबकि सही छ ' बारियो मासा ' किलै कि बेडू बारों महैण नि पाकन ) गीत भौत लोकप्रिय छ । मील वर्ष 2012 में आपणि किताब 'उज्याव ' ( उत्तराखंड सामान्य ज्ञान - कुमाउनी में ) में य गीतक लेखक बृजेन्द्र लाल साह और गायक मोहन उप्रेती लेखि रौछ । य जानकारी मील लोगों हैं पुछि बेर जुटै। कुछ लोगोंल येक लेखक कैं गलत बता और येकैं लोक बटि चलायमान गीत बता ।
मि सबै जानकारों हैं अनुरोध करनू कि कुमाउनीक लोकप्रिय (सुपरहिट) गीत जनरि आपूं कैं जानकारी छ कृपया उ गीतक मुखड़, गीतकार, गायक और संगीतकारक नाम बतूणक कष्ट जरूर करिया ताकि हमरि भाषा कैं ज्यौंन धरणी यूं मनीषियोंक बार में हम सब जाणि सकूं । जानकारी प्रमाणिक (सत्य ) हुण चैंछ । वर्तमान में गीत गाणी सबै गायकों हैं लै निवेदन छ कि कृपया गीत गाण है पैली वीकि चर्चा जरूर करिया । यस कराला तो तुमुकैं ज्यादा सम्मान मिलल और उ व्यक्ति लै गुमनाम नि रवा ।
पूरन चन्द्र कांडपाल
09.07.2020
No comments:
Post a Comment