खरी खरी - 668 : बेझिझक गिच खोलणी चैनी
मसमसै बेर क्ये नि हुन
बेझिझक गिच खोलणी चैनी,
अटकि रौछ बाट में जो दव
हिम्मतल उकैं फोड़णी चैनी ।
अन्यार अन्यार कै बेर
उज्याव नि हुन,
अन्यार में एक मस्याव
जगूणी चैनी ।
मसमसै..
जात - धरम पर जो
लडूं रईं हमुकैं,
यास हैवानों कैं भुड़ जास
चुटणी चैनी ।
मसमसै ...
गिरगिट जस रंग
जो बदलैं रईं जां तां,
उनुकैं बीच बाट में
घसोड़णी चैनी ।
मसमसै...
क्ये दुखै कि बात जरूर हुनलि
जो डड़ाडड़ पड़ि रै,
रुणी कैं एक आऊं
कुतकुतैलि लगूणी चैनी ।
मसमसै बेर...
अच्याल कोरोनाक दौर चलि रौ
सबूंल आपण बचाव करण चैं,
बिना मास्क जो भ्यार घुमैं रईं
उनुकैं पकड़ि बेर गोठ डाउणी चैनी..
मसमसै बेर...
पूरन चन्द्र काण्डपाल
24.07.2020
No comments:
Post a Comment