मीठी मीठी - 225 : कन्हैयालाल डंडरियाल सम्मान अर्पण
(बीना बेंजवाल और गणेश खुगशाल 'गणी' सम्मानित)
27 जनवरी 2019 हुणि उत्तराखण्ड लोकभाषा साहित्य मंच दिल्ली द्वारा हिन्दी -गढ़वालिक रचनाकार बीना बेंजवाल और हिन्दी- गढ़वाली क रचनाकार एवं पत्रकार गणेश खुगशाल 'गणी' कैं वर्ष 2018 क महाकवि कन्हैयालाल डंडरियाल सम्मान रास विहार नई दिल्ली में प्रदान करिगो । सम्मान में द्विये विदुुुजनों कैं शाल, प्रशस्ति पत्र और ₹ 21000/- क चैक भैंट करिगो ।
सम्मान अर्पण लोकगायक नरेन्द्र सिंह नेगी एवं हीरा सिंह राणा ज्यू और दिल्ली प्रदेशक कएक राजनेताओंक सानिध्य में हौछ । यौ सम्मान क प्रायोजक छी दिल्ली पैरामेडिकल मैनेजमेंट इंस्टिट्यूट (DPMI) जैक प्रबंध निदेशक छीं डॉ विनोद बछेती और उत्तराखंड एकता मंच दिल्ली । व्यक्तिगत तौर पर मी सोचनू कि यौ हमरि भाषा कुमाउनी और गढ़वालिक साथ यूं भाषाओंक पाठकों और हमरि भाषाप्रेमियोंक सम्मान छ । आयोजन में नेगी ज्यू और राणा ज्यूक लोकप्रिय गीतोंक लै लोगोंल खूब आंनद ल्हे । य मौक पर उत्तराखंड लोकभाषा साहित्य मंच (संयोजक साहित्यकार दिनेश ध्यानी एवं संरक्षक डॉ विनोद बछेती) ) दिल्ली द्वारा अपार जनसमूहक बीच केंद्र सरकारक प्रतिनिधियों कैं हमरि भाषाओं कैं संविधानक आठूँ अनुसूची में शामिल करणक लिजी प्रस्ताव पारित करि बेर लै भैंट करौ ।
महाकवि कन्हैयालाल डंडरियाल सम्मान हर साल कुमाउनी - गढ़वाली- जौनसारीक एक साहित्यकार कैं वर्ष 2012 बटि दिई जांरौ । य सातूं सम्मान छी । समारोहक पैल सत्र में कुमाउनी- गढ़वाली सिखणी नना कैं प्रमाणपत्र, मैडल और बस्त दि बेर सम्मानित करिगो । य आयोजनक लिजि उत्तराखंड लोकभाषा साहित्य मंच दिल्ली और DPMI साधुवादक पात्र छीं । अलंकरण समारोह आयोजन में आई सबै भाषाप्रेमियों, नारी शक्ति, साहित्यकारों, कवियों, विद्वानों, पत्रकारों, आयोजन समितिक सदस्यों, राजनीतिज्ञों समेत सबै युवाओं एवं भाषा सिखणी नानतिनोंक आयोजकोंल विनम्रताक साथ धन्यवाद और आभार प्रकट करौ ।
पूरन चन्द्र काण्डपाल
28.01.2019
No comments:
Post a Comment