मीठी मीठी - 41 : सफल रौछ अल्मोड़ा कुमाउनी भाषा सम्मेलन
तीन दिनी नौउं 'राष्ट्रीय कुमाउनी भाषा सम्मेलन' अल्माड़ में 3 बटि 5 नवम्बर 2017 तक कुमाउनी भाषा, साहित्य एवं संस्कृति प्रचार समिति कसारदेवी अल्मोड़ा व 'पहरू' कुमाउनी मासिक पत्रिका द्वारा भौत भली भांत आयोजित करीगो । सम्मेलन में देश भर बटि कुमाउनी क रचनाकार और कुमाउनी भाषा प्रेमी लोग ऐ रौछी । यौ मौक पर कयेकों राजनेता, पत्रकार, साहित्यकार और सांस्कृतिक कलाकार लै ऐ रौछी ।
सम्मेलन में हमरि भाषा और यैक रचनाकारों संबंधी कएक प्रस्ताव प्रस्ताव लै पास हईं जै में मुख्य छी हमरि भाषा कैं संविधान क आठूं अनुसूची में शामिल करण और देहरादून में ठंड पड़ी भाषा संस्थान कैं पुनर्जीवित करि बेर भाषा और साहित्यकारों क ख़्याल करण ।
सम्मेलन में कएक किताबों क लै लोकार्पण हौछ । म्यर कुमाउनी उपन्यास "छिलुक" क लै सम्मेलन में लोकार्पण हौछ । सम्मेलन में कएक रचनाकारों कैं कुमाउनी भाषा क अलग-अलग विधाओं में सम्मानित लै करीगो । कुल मिलै बेर यौ एक भौत भल और सफल सम्मेलन छी । सबै भागीदारों ल आयोजन समिति कि पुरि टीम कैं साधुवाद ज्ञापित करौ । सम्मेलन कैं सफल बनूण में योगदान दिणी लोगों क लै आभार प्रकट करीगो । चार दिन कि सम्मेलन ( कुमाउनी भाषा कुम्भ) भागीदारी क बाद आज रत्तै वापिस ऐ गोयूं ।
पूरन चन्द्र काण्डपाल
06.11.2017
No comments:
Post a Comment