मीठी मीठी- 281 : प्रजातंत्रकि जीत
23 मई 2019 हुणि 17उं लोकसभाक चुनाव परिणाम घोषित है गईं । जीत प्रजातंत्रकि हैछ । देश मतदाताओंल स्पष्ट जनादेश दि बेर केंद्र में एक मजबूत सरकार स्थापित करि है । य भारतकि मतदाताकि जीत छ। अब सरकार कैं जनताकि आशाओं, आकांक्षाओं और अपेक्षाओं पर खर उतरण पड़ल और आपण संकल्प पत्र में करी वैदों पर काम करण पड़ल । अगर यस है सकल तो तबै यकैं जनताकि जीत समझी जाल । प्रजातंत्र में सरकार क दगाड़ विपक्षकि लै भौत ठुलिकी भूमिका हिंछ । विपक्ष कैं जनादेश स्वीकार करते हुए आपणि भूमिका निभूण पर जोर दीण पड़ल और जनताकि आवाज कैं सरकार तक उरातार भलीभांत पुजूण पड़ल ।
सवाल य न्हैति कि को जितौ और को हारौ ? आठ हजार है ज्यादै उम्मीदवार चुनाव में छी और 542 चुनाव जितीं । सबै जिती हुई सांसदों कैं शुभकामनाएं और बधाई और हारी हुई उम्मीदवारों कैं लै शुभकामना किलैकि उनुकैं लै देशक मतदाताओंल वोट दे भलेही उनर वोट प्रतिशत कम रौ । जिती हुई सांसदों हैं बै उम्मीद छ कि ऊँ जनता कैं निराश नि कराल । जनता कैं य बातल फरक नि पड़न कि सरकार को दल कि छ, जनता कैं य बातल फरक पड़ूं कि शासन -प्रशासन वीक और देशाक हित में गतिमान रौण चैंछ ।
पूरन चन्द्र काण्डपाल
24.05.2019
No comments:
Post a Comment