मीठी मीठी - 269 : बेतालघाट में पैल कुमाउनी भाषण प्रतियोगिता
20 अप्रैल 2019 हुणि बेतालेश्वर विकास समिति बेतालघाट द्वारा बेतालघाट मिनी स्टेडियम में पैल कुमाउनी कवि सम्मेलन है पैलि नना लिजी कुमाउनी भाषण प्रतियोगता आयोजित करिगे । य प्रतियोगिता में कुल 13 ननाल भाग ल्हे । हरेक प्रतियोगी कैं 4 मिनटक टैम दिइगो । भाषणक 4 विषय छी - पलायन, शिक्षा, स्वास्थ्य और रुजगार । निर्णायक लै 4 छी जनूल आपण - आपण हिसाबल दिई हुईं निर्देशोंक अनुसार हरेक प्रतियोगी कैं अंक देईं । निर्णायकोंक निर्णयक अनुसार संस्था द्वारा तीन नना कैं पैल, दुसर और तिसर पुरस्कार दिईगो जनरि राशि क्रमशः ₹ 5100/-, ₹ 3100/- और ₹ 2100/- छी ।
नना कि भाषण प्रतियोगिता कैं स्टेडियम में बैठी उपस्थित जनताक खूब समर्थन मिलौ । य सफल आयोजक लिजी महोत्सव संयोजक श्री सुरेन्द्र सिंह हालसी ज्यू और उनरि पुरि टीम कैं भौत -भौत बधै और शुभकामना । य मौक पर बेतालघाट में आपणि भाषा कि बातक दगाड़ 'पहरू', कुर्मांचल अखबार' और 'कुमगढ़' पत्र-पत्रिकाओं कि लै चर्चा हैछ । आपणि भाषा कैं ज्यौंन धरणा लिजी यास किस्मक कार्यक्रम आयोजित हुण चैनी । अच्याल सांस्कृतिक कार्यक्रमक नाम पर सिर्फ गीत- नृत्य आयोजनोंक ज्यादै प्रचलन हूँरौ । गीत- नृत्य आपणि जाग पर ठीक छ पर यूं आयोजनों में नना लिजी लै कुछ न कुछ प्रतियोगिता हुण चैंछ । बेतालघाट विकास समितिल नना कैं यस किस्मक प्रतियोगी मंच दि बेर हमरि भाषाक प्रचार त करौ, नना में भाषाकि जागरूकता लै पैद करी । यास प्रयासोंल हमरि भाषा कि चर्चा त ह्वलि, हमरि भाषा संविधानक आठूँ अनुसूची में लै पुजलि ।
पूरन चन्द्र काण्डपाल
04.05.2019
No comments:
Post a Comment