मीठी मीठी - 274 : हमरि भाषाकि सिखलाई, साहिबाबाद
बेई 11 मई 2019 अपराह्न हुणि मैट्रिक्स अकादेमी शालीमार गार्डन-II, साहिबाबाद, गाजियाबाद उ प्र में कुमाउनी -गढ़वाली कक्षाओंक कएक संस्थाओंल मिलि बेर आयोजन करौ । इनुमें मुख्य संस्था छी उत्तरांचल भ्रातृ समिति, "सृजन से'' पत्रिका, उत्तराखंड यूथ एसोसिएसन, हिमालय रिसोल्यूशन एन्हांसमेंट सोसाइटी आदि । द्विये कक्षाओंक करीब 30-35 विद्यार्थी ऐ रौछी जनूल हमरि भाषा सिखण में भल मन लगा । यूं कक्षाओं में कुमाउनी भाषाक अध्यापक पूरन चन्द्र काण्डपाल और गढ़वाली भाषाक अध्यापक लोकभाषा साहित्य मंच दिल्लीक संयोजक दिनेश ध्यानी ज्यू छी ।
आयोजनक टैम पर सामाजिक कार्यकर्ता एवं आयोजक दलबीर सिंह रावत ज्यू, कैलाश पांडे ज्यू समेत उनरि टीमक कएक लोग एवं मातृशक्ति मौजूद छी । यूं भाषा सिखलाई कक्षा 27 अप्रैल 2019 बटि लगातार हर शनिवार - ऐतवार हुणि आयोजित हूँ रईं । 2 जून 2019 तक यूं कक्षा हर शनिवार -ऐतवार हुणि आयोजित होते रौल । नान यूं कक्षाओं में भलि रुचि देखूं रईं । हमरि भाषा कैं नना कैं सिखूँण कि संस्थाओंकि य सोच हमरि भाषाक संरक्षण और प्रसार में भौत भलि मददगार बनलि । उम्मीद छ कि हमार नान हमरि भाषा कैं जरूर सिखाल और येक प्रसार लै कराल । भाषा सिखलाईक दगाड़ में कएक अन्य गतिविधि लै नना कैं सिखाई जांरै । शुभकामना ।
(आज 12 मई 2019, 0710 बजी रतै लोकसभा सांसद लिजी वोट दि बेर ऐ गोयूं । वोटर नंबर 1 म्यर बूथ में । सबै वोटरों कैं शुभकामना ।)
पूरन चन्द्र काण्डपाल
12.05.2019
No comments:
Post a Comment