मीठी मीठी - 433 : : हमरि भाषा भौत भलि - 12 वर्षक ," पहरू "
कुमाउनी मासिक पत्रिका " पहरू " फरवरी 2020 अंक मिलिगो । भौत भल आवरण " दैणक फूल " और भतेर लै भलि सामग्री छपि रैछ । पोस्टल विभाग कि कोताही वजैल दिसम्बर 2019 और जनवरी 2020 अंक नि मिल । वर्तमान में चार पत्र - पत्रिका हमरि भाषाक लिजी भल काम करें रईं जनरि चर्चा लै करुल ।
हमरि भाषा कुमाउनी-गढ़वाली लगभग 1100 वर्ष पुराणि छ । यैक संदर्भ हमर पास मौजूद छीं । कत्यूरी और चंद राजाओं क टैम में य राजकाज कि भाषा छी । आज लै करीब 400 लोग कुमाउनी में लेखनी जनर के न के साहित्य कुमाउनी पत्रिका "पहरू" में छपि गो । भाषा संविधान क आठूँ अनुसूची में आजि लै नि पुजि रइ । प्रयास चलि रौछ । सबूं हैं निवेदन छ कि भाषा कैं व्यवहार में धरो । हमार चार साहित्यकार छीं जनूकैं साहित्य अकादमी भाषा पुरस्कार लै प्रदान हैगो ।
"पहरू" मासिक कुमाउनी पत्रिका लिजी डॉ हयात सिंह रावत (संपादक मोब 9412924897) अल्मोड़ा दगै संपर्क करी जै सकूं । कीमत ₹ 20/- मासिक । य पत्रिका डाक द्वारा घर ऐ सकीं । विगत 11 वर्ष बटि म्यर पास उरातार य पत्रिका पूजैं रै । मि येक आजीवन सदस्य छ्यूँ । बाकि बात आपूं हयातदा दगै करि सकछा । उत्तराखंडी भाषाओं कि त्रैमासिक पत्रिका "कुमगढ़ " जो काठगोदाम बै प्रकाशित हिंछ वीक लै आपूं सदस्य बनि सकछा । मि येक लै आजीवन सदस्य छ्यूँ । संपादक दामोदर जोशी 'देवांशु' मो.9411309868, मूल्य ₹ 25/-। पिथौरागढ़ बै कुमाउनी मासिक पत्रिका " आदलि कुशलि " छपैं रै । येक संपादक डॉ सरस्वती कोहली ( 9756553728 ) दगै संपर्क करी जै सकूं । मूल्य ₹ 30/- छ । अल्माड़ बै छपणी कुमाउनी साप्ताहिक अखबार " कुर्मांचाल अखबार " लै पाठकों लिजी मौजूद छ । सालाना सहयोग ₹ 200/- मोब. 7830039032 , संपादक डॉ सी पी फुलोरिया छीं । )
कुमाउनी भाषा में कविता संग्रह, कहानि संग्रह, नाटक, उपन्यास, सामान्य ज्ञान, निबंध, अनुच्छेद, चिठ्ठी, खंड काव्य, गद्य, संस्मरण, आलेख सहित सबै विधाओं में साहित्य उपलब्ध छ । बस एक बात य लै कूंण चानू कि आपणि इज और आपणि भाषा ( दुदबोलि, मातृभाषा ) कैं कभैं लै निभुलण चैन । जब हमरि भाषा व्यवहार में रौलि तबै य ज्यौन लै रौलि । आपण नना दागाड़ और आपण आपस में आपणि भाषा में बलाण झन भुलिया ।
हमरि भाषा भौत भलि,
करि ल्यो ये दगै प्यार ।
बिन आपणि भाषा बलाइए,
नि ऊंनि दिल कि बात भ्यार।।
पूरन चन्द्र काण्डपाल
09.03.2020
No comments:
Post a Comment