खरी खरी - 837: हिम्मत बटोव
भौत लोग कोरोनाल बेचैन
टेस्ट करणियांकि लामि लैन
हमर सिस्टम लाचार
चौतरफां पड़ हाहाकार
आक्सीजन हैगे लापता
दवाइ लै झणि कां भरमता
ब्लैक में सिलिंडर भराइ
ब्लैक में मिलैं रै दवाइ
मौतोंल भर शमशान
जाग न्हैति कब्रिस्तान
लोग कूंरीं के लै लि लियो
हमुकैं आक्सीजन दि दियो
कोर्ट कि जबरजस्त फटकार
को छ य हालतक जिम्मेदार?
यां बिकराल होते गे बीमारी
ऊं करते रईं चुनाव तैयारी
उनूल करी बड़ि बड़ि बात
रित हात खालि बातै बात
कसि य नेताओंकि नाकामी
इनार वजैल कोरोना सुनामी
दयो हल सबूंल जांणि
बजर पड़ल कैल नि जांणि
कोर्टल बताय भौत बेहाल
य छ कोरोना आपातकाल
को सुनो जनता कि डाड़
नेता सब जनता है टाड़
हुमणा चार कुंभ गाय
मनखी छी भेड़ बनि गाय
य साल कुंभ रोकण चैंछी
राज्योंक चुनाव टालण चैंछी
खूब देईं अफलतून भाषण
जनर खुद नि कर पालन
डेढ़ गजक छी लाम जिबड़
नि थाक झुटि करि बड़ बड़
आठ चरणों में कर चुनाव
रैलियों में किटि अंगवाव
बखत पर काम नि कर
तबै लोग बेमौत मर
नेता खुद लुकी जांरीं
हगण ता लोटिय चांरीं
आब अस्पताव पुछरीं
बाग गोठ घुस तब हु ढुंनरीं
हमारा नेता यास डगमगाय
काटी में मुतणा काम नि आय
अरे मनखिया नि हौ निराश
जब तली सांस तब तली आस
भली भांत आपूं कैं टटोव
टुटिए झन हिम्मत बटोव
माथ वाव कैं दिलल याद कर
डरणी माहौल छ पर तू नि डर
जतनल कर आपण बचाव
थमी जाल त्यर मनक उमाव
आब बीमारीकि वैक्सीन ऐगे
जिंदगी कि उम्मीद जगि गे
ढंगल मास्क लगा जरूर
भीड़ है आपुकैं धरिए दूर
एक दिन जरूर हल कोरोनाक अंत
पतेल झड़ी फंगा पर आल बसंत।
पूरन चन्द्र कांडपाल
26.04.2021
No comments:
Post a Comment