खरी खरी - 805 : तय टैम पर जगौ दी
अच्याल क्वे लै कार्यक्रम
तय टैम पर शुरू नि हुन,
जो टैम पर ऐ जानी उनार
भैटी भैटिए पटै जानी घुन ।
देर में कार्यक्रम शुरू हुंछ
तय टैमक एक घंट बाद,
य एक घंट बरबादी क
के जवाब छ तुमार पास ?
किलै बलूंछा लोगों कैं पैली
ठीक तय टैम पर बलौ,
पै कैक इंतजार नि करो
तय समय पर दी जलौ ।
तुमार देखादेखी आब क्वे लै
टैम कि परवा नि करैं राय,
जो टैम पर पुजि जानी
उनू पर लै नि तरसै राय ।
आयोजन करणियो न्यूत में
तय टैमक सम्मान करो,
क्वे टैम पर ओ झन ओ
कार्यक्रम टैम पर शुरू करो ।
जो टैम पर पुजि जानी
उनुकैं बेकार सजा नि दियो,
सोचो, भल काम करि बेर
बेकारक अपजस नि लियो ।
पूरन चन्द्र कांडपाल
10.03.2021
No comments:
Post a Comment