मीठी मीठी - 409 : उत्तरैणी सांस्कृतिक आयोजन बुराड़ी और अवंतिका रोहिणी दिल्ली
15 जनवरी 2020 हुणि देशकि राजधानी दिल्ली में कएक जाग उत्तरैणी सांस्कृतिक कार्यक्रम आयोजित करी गईं । द्वि जाग भागीदारी करणक मौक मिलौ । पैल आयोजन बुराड़ी कौशिक एंक्लेव पार्ट - II में गंगोत्री सामाजिक संस्था (पं ) दिल्ली द्वारा आयोजित छी । यां सांस्कृतिक आयोजन में कलाकारोंक दगाड़ सहभागिता में मुख्य छी सर्वश्री पूरन सुंदरियाल, हरीश नौटियाल, राजकुमार आर्या और राकेश नेगी (संचालन ) । य कार्यक्रम में कुमाउनी - गढ़वाली कवि सम्मेलन लै आयोजित करिगो जमें सर्वश्री पूरन चन्द्र कांडपाल, जयपाल सिंह रावत, कुंज विहारी मुंडेपी और गिरीश भावुक मुख्य कवि छी । श्री गंभीर सिंह नेगी और उनरि टीम में सर्वश्री लाखी राम डबराल, धर्मपाल कुमैई, गबर सिंह गुसाई, राकेश नेगी समेत कएक सामाजिक कार्यकर्ता जुड़ी छी । कुमाऊनी - गढ़वाली कवि सम्मेलन कैं आयोजन में शामिल करणी संस्था कि सोच कैं साधुवाद ।
उत्तरैनी त्यारक दुसर कार्यक्रम देवभूमि उत्तराखंड धार्मिक - सांस्कृतिक विकास संगठन (पं ) अवंतिका रोहिणी दिल्ली द्वारा डीडीए कम्यूनिटी सेंटर सेक्टर 3, रोहिणी दिल्ली में आयोजित करिगो । यां श्रीमती देवकी शर्माक निर्देशन में दिव्य कला संगम संस्था दिल्लीक कलाकारों द्वारा कार्यक्रम प्रस्तुत करिगो जमें मुख्य भूमिका निभूणी छी निर्देशक श्रीमती देवकी शर्मा, मोहन मिश्रा, प्रकाश काल्हा आदि । कार्यक्रम आयोजित करणी टीम में मुख्य छी सर्वश्री एन डी लखेड़ा, भूपाल सिंह बिष्ट, प्रदीप जोशी समेत उनरि पुरि टीम । वरिष्ठ सामाजिक कार्यकर्ता सर्वश्री के एस बिष्ट, प्रेम सिंह बिष्ट, निगम पार्षद अनेश जैन, तारा दत्त पांडे, डॉ बी सी लोहनी, समेत य सफल आयोजन में कएक गणमान्य व्यक्ति मौजूद छी ।
द्विए आयोजनों में बागसर में 13 जनवरी 1921 हुणि उतरैणीक दिन अंग्रेज डिप्टी कमिश्नरक सामणि कुमाऊं केशरी बद्री दत्त पांडे ज्यूक कूण पर ‘कुली बेगारा’ क सब रजिस्टर वां संगम में बगूण और उ दिन बै उत्तराखंड में ‘कुली बेगार’ (बिना मजूरी दिए जोर-जबरदस्ती वांक लोगों हैं बै ब्वज / डोलि / कमोड उठौण ) क कलंक और अंग्रेजोंक जुल्म ख़तम हुण, य प्रसंग कि चर्चा लै हैछ । द्विए आयोजनों में भौत लोग मौजूद छी जमें नारी शक्ति, नानतिन और कएक कीर्तन मंडलीक सदस्य लै भागीदार रईं । भौत भल सांस्कृतिक प्रस्तुति दिणी यूं द्विए आयोजनों कि पुरि टीम, कलाकार और दर्शकों समेत सबै मितुरों कैं उतरैणी कि भौत भौत शुभकामना |
पूरन चन्द्र काण्डपाल
16.01.2020
No comments:
Post a Comment