खरी खरी - 546 : कस जमान ऐगो (I)
ब्या में बरेतिय लोग सिद
ब्योलि कै घर ऊंनी,
खै-पी बेर लिफाफ
ब्यौला बाप कैं पकडूंनी,
कै दगै बात करण क
टैम न्हैति बतूनी,
जैमाव डाउण है
पैलिकै खसिकि ऊंनी,
बरयात कूण में सिरफ
ब्यौलक परिवार वां रैगो,
कस जमान देखौ
कस जमान ऐगो ।
ब्याक लगन कि
परवा क्वे नि करन,
वीडियो फोटो वलांक
सब जाग हुकम चलूं,
खिसाई बामण चुपचाप
टकटकी लगै भैरां,
कभतै झपकि ल्युछ
कभतै आंख मिनू,
फोटोग्राफी भलि है गेई
समझो भल ब्या हैगो,
कस जमान देखौ
कस जमान ऐगो ।
पूरन चन्द्र काण्डपाल
06.01. 2020
No comments:
Post a Comment