मीठी मीठी - 336 : सांस्कृतिक कुमाऊं दर्शन नोएडा ( उत्तर प्रदेश )
बेई 18 अगस्त 2019 हुणि नोएडा सेक्टर 19 कम्युनिटी सेंटर में सांस्कृतिक कुमाऊं दर्शन (ट्रस्ट) नोएडा द्वारा संस्थाक तिसर वार्षिकोत्सव आयोजित करिगो । आयोजन में मुख्य अतिथि सी हौक ग्रुपक चेयरमैन श्री नरेन्दर सिंह लडवाल ज्यू और विशिष्ट अतिथि सर्वश्री कृष्ण चन्द्र जोशी (उद्यमी ) हेम पन्त ( नाट्य रंगमंच कलाकार) , गंगा दत्त भट्ट ( कला निदेशक ), पूरन चन्द्र कांडपाल ( साहित्यकार) समेत कयेक गणमान्य लोग मौजूद छी । कार्यक्रम में सुप्रसिद्ध लोकगायक हीरा सिंह राणा और गायिका सुश्री आशा नेगी कि विशेष मौजूदगी रै । अन्य गायकों में श्री सुरेश जोशी और के सी पंत लै समारोह में छी ।
संस्कृति और कला संगमक य रोचक कार्यक्रम में संस्था कि नारीशक्ति समेत नान - ठुल करीब तीन दर्जन कलाकारोंल भौत भलि प्रस्तुति दी बेर सभागार में दर्शकोंक भल मनोरंजन करौ । राणा ज्यू और आशा नेगी ज्यूक गीतोंल लै दर्शक भौत खुशि हईं । करीब साढ़े तीन घंट तक य आयोजक सबै लोगोंल आनंद उठा । कार्यक्रम में संगीत प्रस्तुत करणी टीम लै भलि छी । य आयोजन क संचालन सुधीर पंत ज्यू और उनार दगड़ियों ( पंत ज्यू और जोशी ज्यू ) ल करौ । आपणी भाषा और संस्कृति कैं सिंचित करण क लिजी सांस्कृतिक कुमाऊं दर्शन ट्रस्ट नोएडा कि पुरी टीम कैं बधाई और शुभकामना ।
पूरन चन्द्र कांडपाल
19.08.2019
No comments:
Post a Comment