मीठी मीठी - 324 : हटिगो अनुच्छेद 370
आंखिर 2014 में करी एन डी ए सरकार क वैद 2019 में पुर हैगो । बेई 05 अगस्त 2019 हुणि भारत क जम्मू - कश्मीर राज्य बै राज्य कैं विशेष स्वायतता दिणी अनुच्छेद 370 कि सब धारा (2) और (3 ) कैं हटै है और राज्य क पुनर्गठन लै हैगो जमें जम्मू - कश्मीर कैं विधान सभा समेत केंद्र शासित प्रदेश बना और लद्दाख कैं बिना विधान सभाक केंद्र शासित प्रदेश बनै है ।
यहै पेली राज्यक ज्यादातर भागों में धारा 144 लगै दी और इंटरनेट सेवा लै रोकि दे ताकि क्वे लै नकि घटना नि घटो और कानून - व्यवस्था कि समस्या पैद नि हो । वांक द्वि पूर्व मुख्यमंत्री नजरबंद है गईं । येक दगाड़ 27 अक्टूबर 1947 कि उ अस्थाई अनुच्छेद पूर्ण रूप ल जम्मू कश्मीर बै ख़तम हैगो । आब जम्मू - कश्मीरक संविधान लै ख़तम हैगो । अनुच्छेद 370 क अंश (1) नि हटै रय । वर्ष 1947 में अनुच्छेद 370 क विशेष दर्ज़ उ टैमक महाराजा हरिसिंह कि मांग पर दिई गो किलै कि ऊं येक बिना भारत में विलय हुणि तैयार नि हाय जबकि पाकिस्तान महाराजा कि क्वे लै मांग पुर करैं हैं तैयार हैगो छी ।
अाब भारत 28 राज्यों और 9 केंद्र शासित प्रदेशोंक गणतंत्र हैगो । राज्य सभा में बिलक पक्ष में 125 और विपक्ष में 61 वोट पड़ीं और बिल पास हैगो । विरोधी दलों क मानण छ कि उनुकैं विश्वास में नि लिई गोय । एन डी ए क कुछ सहयोगी दलों ल लै राज्यसभा है बायकाट करौ। उम्मीद करण चैंछ कि कि जम्मू - कश्मीर राज्यक य पुनर्गठन ल आब य क्षेत्र में शांति स्थापित हलि और द्विए केंद्र शासित प्रदेशों क तेजी क साथ भल विकास हल ।
पूरन चन्द्र कांडपाल
06.08.2019
No comments:
Post a Comment