byoli dhundho : ब्योली ढूंढ़ो

मीठी मीठी - 423 :ब्योलि ढूंढों ( कुमाउनी गीत )

अणब्यवाई लौंडों कि डिमांड पर य गीत  ‘ब्योलि ढूंढो’ ('उकाव –होराव' किताब -२००८ )

(कुंवारे लड़के के मन में कैसी दुल्हन  की कल्पना है, इस गीत में अपने मन की बात वह अपने बड़े भाई से कह रहा है | )

दाज्यू मिहुणी ब्योलि ढूंढो
गौं बै भली-भली
मिकणी नि चैनी दाज्यू शहर की च्येली |

उत्तराखंड बटी  ढूंढों और कैंबै नि चैनी
कसिक समाउल मैं तेजतरार स्यैणी
आजकल च्येलिया हैगीं बंदूकै की नली । मिकणी...

सिदि सादि नानि चैंछ पढ़िया लेखिया
जो ख्वारम धोति धरो आंचव गाड़िया
मिसिरी कि कुंज जसी, गूड़ कसि डली । मिकणी...

छवट-छ्वट घुगंट मजी चमकणी बिंदुली
नगदार कनफूल दगै नानि नानि नथूली
देखण में लागो जसी गुलाब की कली | मिकणी...

बानकि कुटुकि ढूंढो, ढूंढो काई गोरी
लुपलुपी सुपसुपी ढूंढो चौमासै की तोरी
काकड़ फुल्युड़ जसी कैरुवै गेदुली | मिकणी...

सासु-सौर क भरम करो
भल-भल व्यवहार
ननद देवर दगै रौ भै-बैणी चार
पिनाउ कि गांज जसी झन ल्याया चिलैली | मिकणी...

औंणियां जणियां देखो घर देखो समाज
खुशी-खुशी जो निभैद्यो द्वि घरों कि लाज
धान कि बालड़ी जसी फुन वाई धमेली | मिकणी...

पूरन चन्द्र काण्डपाल
06.02.2020