मीठी मीठी - 400 : महाकौतिक इंदिरापुरम
28 दिसम्बर 2019 हुणि 9 दिनक इंदिरापुरम महाकौतिकक आठूं दिन छी । य शानदार और कुशलताल आयोजित एवम् सुव्यवस्थित कौतिक में एक शानदार कुमाउनी-गढ़वाली कवि सम्मेलन लै आयोजित करिगो । एक दर्जन है ज्यादा उत्तराखंडी कवियोंल कएक गणमान्य मैंसों, पत्रकारों, राजनीतिज्ञों, कवियों, साहित्यकारों और सुधि दर्शकोंक सानिध्य में आपणि भाषा में काव्यपाठ करौ जमें आमंत्रित कवि छी सर्वश्री पूरन चन्द्र कांडपाल, दिनेश ध्यानी, जयपाल सिंह रावत, पायास पोखड़ा, रमेश हितैषी, कवि सम्मेलनक सूत्रधार बी पी जुयाल, ओ पी सेमवाल, डा केदारखंडी, जगदम्बा चमोला, जगत कुमाउनी, सुश्री उपासना सेमवाल और प्रदीप खुदेड । सबै कवियोंल भौत भाल कविताओं ल श्रोताओं कैं खुशि करौ । कवि सम्मेलन कि अध्यक्षता पूरन चन्द्र कांडपालल करी और मंच संचालन सूत्रधार बी पी जुयाल और ओ पी सेमवालल करौ ।
य महाकौतिक (मेघा इवेंट, उत्तराखंड ट्रेड फेयर) क आयोजन उत्तराखंडी समाज कि पर्वतीय सांस्कृतिक संस्था (पं) ल करौ जैक मुखिया छीं सुप्रसिद्ध संगीत निदेशक राजेन्द्र चौहान । चौहान ज्यूल य कौतिक में सबूं कैं पुर उत्तराखंडक दर्शन कराईं जमें उत्तराखंडक व्यंजनों समेत वांकि चीजों क आगन्तुकोंल खूब लुत्फ उठा। आपण किस्मक गाजियाबाद में आयोजित हुणी य 9ऊं म्यल छी । य म्यल में उत्तराखंडक कृषि उत्पादों कि भलि बिक्री हैछ । उत्तराखंडी व्यंजनों कि भरमारक लै आगंतुकोंल जमि बेर आनंद ले । य म्यल में रोजाना सांस्कृतिक कार्यक्रम लै आयोजित करी गईं जमें नईं - नईं कलाकारों और गायकों कैं लै आपणि कला प्रदर्शन क मौक मिलौ । कएक संदेशात्मक नाट्य मंचन लै य आयोजन में करी गईं ।
य सफल आयोजनक श्रेय चौहान ज्यू कि संगठित टीम कैं जांछ जमें उनरि घरावाइ प्रसिद्ध गायिका कल्पना चौहान लै छीं । भाषा, साहित्य, संस्कृति, गीत, संगीत और लोक जीवनक य महाकुंभक सफल आयोजन करणक लिजी राजेन्द्र चौहान ज्यू और उनरि टीम कैं भौत भौत बधै और शुभकामना ।
पूरन चन्द्र काण्डपाल
29.12. 2019
No comments:
Post a Comment