मीठी मीठी - 397 : लोक -उत्सवक दिल्ली में दुसर दिन
गढ़वाली, कुमाउनी और जौनसारी भाषा अकादमी, कला - संस्कृति - भाषा विभाग, दिल्ली सरकार द्वारा सेंट्रल पार्क राजीव चौक नई दिल्ली में द्वि दिनी लोक - उत्सव आयोजनक 22 दिसंबर 2019 हुणि दुसर दिन लै भौत गिड़दम रौछ । ठीक 2 बजी कार्यक्रम शुरू हौछ । आयोजनक शुभारंभ अकादमीक उपाध्यक्ष, कवि और गायक हीरा सिंह राणा ज्यू एवं अकादमीक सचिव डॉ जीतराम भट्ट ज्यू समेत सबै सदस्योंल दी जगै बेर करौ । गणेश वंदना में दर्शकोंल लै भागीदारी निभै ।
दुसार दिन लै लोक उत्सव में उत्तराखंडक लोकजीवन एवम् साहित्यक प्रदर्शन लै करिगो और उत्तराखंडी भाषाओं कि जानकारी, साहित्य एवम् इतिहास लै बताइगो । लोक संस्कृतिक कएक कार्यक्रम लै हईं जमें नान -ठुल सबै कलाकारोंल भागीदारी निभै । आयोजन स्थल में दर्शकों कि भौत ठुल गिड़दम देखण में आछ जनूल कार्यक्रमक खूब आनंद ले । य मौक पर कएक पत्रकार, साहित्यकार, कवि, राजनीतिज्ञ, व्यवसाई, मातृशक्ति और नानतिन लै मौजूद छी । आयोजन कैं राणा ज्यूल संबोधित करौ । राणा ज्यूल दिल्ली सरकारक भाषा अकादमी बनूणक लिजी आभार व्यक्त करौ । कार्यक्रम संचालन करते हुए डॉ भट्ट ज्यूल सबै दर्शकों कैं उत्तराखंड कि सांस्कृतिक झलक बतूनै धन्यवाद दे । सबै दर्शकोंल दिल्ली में हमरि भाषा अकादमी बनण पर भौत खुशि जतै ।
पूरन चन्द्र कांडपाल
23.12.2019
No comments:
Post a Comment