मीठी मीठी - 396 : सेंट्रल पार्क राजीव चौक में लोक -उत्सव
गढ़वाली, कुमाउनी और जौनसारी भाषा अकादमी, कला - संस्कृति - भाषा विभाग, दिल्ली सरकार द्वारा सेंट्रल पार्क राजीव चौक नई दिल्ली में द्वि दिनी लोक - उत्सवक आयोजन 21 दिसंबर 2019 हुणि 2 बजी शुरू हौछ जो 22 दिसंबर 2019 हुणी लै जारी रौल । आयोजनक शुभारंभ दिल्ली सरकारक उप - मुख्यमंत्री और अकादमीक अध्यक्ष मनीष सिसोदिया ज्यू और अकादमीक उपाध्यक्ष, कवि और गायक हीरा सिंह राणा ज्यू एवं अकादमीक सचिव डॉ जीतराम भट्ट ज्यू समेत सबै सदस्यों ल दी जगै बेर करौ ।
य लोक उत्सव में उत्तराखंडक लोकजीवन एवम् साहित्यक प्रदर्शन लै करिगो और उत्तराखंडी भाषाओं कि जानकारी, साहित्य एवम् इतिहास लै बताइगो । लोक संस्कृतिक कएक कार्यक्रम लै हईं जमें नान -ठुल सबै कलाकारोंल भागीदारी निभै । आयोजन स्थल में दर्शकों कि भौत ठुल गिड़दम देखण में आछ जनूल कार्यक्रमक खूब आनंद ले । य मौक पर कएक पत्रकार, साहित्यकार, कवि, राजनीतिज्ञ, व्यवसाई, मातृशक्ति और नानतिन लै मौजूद छी । आयोजन कैं सिसोदिया ज्यू और राणा ज्यूल संबोधित करौ । राणा ज्यूल दिल्ली सरकारक भाषा अकादमी बनूणक लिजी आभार व्यक्त करौ । कार्यक्रम संचालन करते हुए डॉ भट्ट ज्यूल सबै दर्शकों कैं उत्तराखंड कि सांस्कृतिक झलक बतूनै धन्यवाद दे । य सफल आयोजनक लिजी अकादमीक सचिव समेत पुरी टीम कैं धन्यवाद ।
पूरन चन्द्र कांडपाल
22.12.2019
No comments:
Post a Comment