मीठी मीठी - 156 : शिक्षक दिवस पर सम्मान
बेई 5 सितंबर 2018 शिक्षक दिवसक मौक पर नई दिल्ली स्थित कंस्टीट्यूसन क्लबक स्पीकर हाल में ननां कैं कुमाउनी- गढ़वाली सिखूंणी अध्यापकों कैं दिल्ली पैरामेडिकल ऐंड मैनेजमेंट इंस्टिट्यूट (DPMI) द्वारा उत्तराखंड लोकभाषा साहित्य मंच दिल्लीक सानिध्य में सम्मानित करीगो । य मौक पर वरिष्ठ लोकगायक-कवि श्री नरेंद्र सिंह नेगी, श्री हीरा सिंह राणा, डी आई जी बीएसफ श्री टोलिया, हिंदी-संस्कृत अकादमीक सचिव डॉ जीतराम भट्ट, पूर्व आईएस कृष्ण आर्य, अणुव्रतक श्री रमेश काण्डपाल और डीपीएमआई क निदेशक डॉ विनोद बछेती ज्यू मुख्य वक्ता छी । कएक गणमान्य लोगोंक कि मौजूदगी में करीब छै दर्जन भाषा सिख़ूणी शिक्षकों और समाजसेवियों कैं सम्मानित करीगो । यूं लोगों ल दिल्ली एनसीआर में करीब द्वि दर्जन जगां पर ननां कैं 20 मई बटि 5 अगस्त 2018 तकाक 12 इतवारों हुणि हमरि भाषा सिखै ।
हम उम्मीद करनू कि हमरि भाषाओं कैं देर-सबेर संविधान की आठवीं अनुसूची में जाग जरुर मिललि । दिल्ली में हमरि भाषाओं कि अकादमी बनण कि आब पुरि उम्मीद हैगे जैक लिजी लोकभाषा साहित्य मंच दिल्ली, डीपीएमआई और उत्तराखंड एकता मंच निरंतर प्रयासरत रौछ । सबै मित्रों हैं निवेदन छ कि आपणि मातृ भाषा कैं व्यवहार में धरनै यकैं सिंचित करते रौण चैंछ किलै कि भाषाक गुम हुण पर संस्कृति और सभ्यता लै गुम है जींछ और मनखियेकि पछ्याण लै मेटी जींछ । हम दुनिय कि क्वे लै भाषा सिखूँ पर आपणि इज और आपणि मातृभाषा कैं हमूल नि भुलाण चैन । डीपीएमआई ,उत्तराखंड लोकभाषा साहित्य मंच दिल्ली, उत्तराखंड एकता मंच दिल्ली और अन्य सबै सहयोगियों क य भाषा उत्सव कैं सफल बनूणक लिजी आभार ।
पूरन चन्द्र काण्डपाल
06.09.2018
No comments:
Post a Comment