खरी खरी-302 : बखत कि बलै ल्युल
पार्टी में नईं -नईं
ब्या वलां पर
सबूं कि नजर लैरीं,
एक्कै प्लेटम
ब्योलि-ब्यौल
दगड़ - दगड़ै फैरीं,
ब्योलि चमच ल
पच -पच पचकूं रै,
ब्यौल प्लेट
पकड़िए रैगो,
कस जमान देखौ
कस जमान ऐगो,
बखता त्यरि बलै ल्युल
'बुधि दा' कैगो ।
आब जन्मदिन लै
नाईं तरीकैल मनूंरीं,
केका माथ बै
मोमबत्ती जगूंरीं,
तीन आंखर अंग्रेजी
सबूं ल सिखि है,
अंग्रेजी में कूंरीं
हैप्पी बर डे,
जैल दी जगूण चैंछी
उ निमूं फैगो,
कस जमान देखौ
कस जमान ऐगो,
बखता त्येरि बलै ल्युल
'बुधि दा' कैगो ।
पूरन चन्द्र काण्डपाल
04.09.2018
No comments:
Post a Comment