खरी खरी - 519 : अलग थकुली नि बजौ
देशा का मिलि गीत कौ
अलग थकुली नि बजौ ।
एकै उल्लू भौत छी
पुर बगिच उजाड़ू हूँ
सब डवां में उल्लू भै गयीं
बगिचौ भल्याम कसी हूँ ।
गिच खोलो भ्यार औ
भितेर नि मसमसौ, देशा क ....
समाओ य देशें कें
हिमाल धात लगूंरौ
बचौ य बगीचे कें
जहर यमे बगैँ रौ ।
उंण नि द्यो य गाड़ कें
बाँध एक ठाड़ करौ, देशा क .....
उठो आ्ब नि सेतो
यूं उल्लू तुमुकें चै रईं
इनू कें दूर खदेड़ो
जो म्या्र डवां में भै रईं ।
यकलै यूं नि भाजवा
दग डै जौ दौड़ी बे जौ . देशा क .....
शहीदों कें याद करो
घूसखोरों देखि नि डरो
कामचोरों हूँ काम करौ
हक़ आपण मागि बे रौ ।
अंधविश्वास क गव घोटो
अघिल औ पिछाड़ी नि रौ.
देशा क मिलि गीत कौ
अलग थकुली नि बजौ ।
पूरन चन्द्र कांडपाल
21.09.2020
Sunday 20 September 2020
Alag thakuli ni bajau : अलग थकुली नि बजौ
Subscribe to:
Post Comments (Atom)
No comments:
Post a Comment