मीठी मीठी - 252 : पर्वतीय लोक कला मंचक "सांस्कृतिक संगम''
बेई 24 मार्च 2019 हुणि प्यारे लाल भवन आई टी ओ नई दिल्ली में पर्वतीय लोक कला मंच (पं) दिल्ली द्वारा उत्तराखंड लोक कलाक एक शानदार कार्यक्रम "सांस्कृतिक संगम" प्रस्तुत करिगो । कार्यक्रमकि शुरुआत द्वि किताबोंक लोकार्पणक साथ हैछ । य कार्यक्रम में उत्तराखंडक कएक नई- पुराण गायकों कैं आपणि लोकगायकी/गीत प्रस्तुत करणक मौक मिलौ जनुमें मुख्य छी - सु.मधु बेरिया, सत्येंद्र पंडरियाल, भुवन रावत, चंद्रकांता सुंदरियाल शर्मा, दीपा पंत, अरविंद सिंह रावत, मोहित डोभाल, सत्यम तेजवान आदि । श्रोताओंल पांच -छै दसक है लै पुराण लोकचर्चित गीतोंक आनंद ल्हे । कार्यक्रमक बीच बीच में पर्वतीय लोक कला मंचक कलाकरोंल लै आपणि भलि प्रस्तुति दीबेर खूब ताइ बटोरीं ।
''सांस्कृतिक संगम" हेम पंत ज्यू द्वारा परिकल्पित एवं संचालित छी जैक निर्देशन गंगा दत्त भट्ट ज्यू द्वारा और संगीत निर्देशन वीरेंद्र नेगी राही ज्यू द्वारा करिगो । भलेही कार्यक्रमक अंतिम चरण नि देख सक फिर लै य आयोजन भौत भल रौछ । लोकगीत -गायन में कलाकारों कैं दिल्ली महानगर में एक मंच दीणक संस्थाकि य भौत भलि सोच और प्रयास छी । विनम्रतापूर्वक सुझाव दीण चानू कि कलाकारोंल गीत/गायन प्रस्तुतिक टैम में शुरुआती शब्द लै आपणि भाषा में बलाण चैनी । जब गीत प्रस्तुतिकरण आपणि भाषा में हुंछ तो शुरुआती शब्द लै आपणि भाषाक भाल लागाल । सी हॉक ग्रुपक सीएमडी नरेन्द्र सिंह लडवाल ज्यूक मंच बै आपणि भाषा में संबोधन भौत भल लागौ । 'आपणि भाषा भौत भलि, करि ल्यो य दगै प्यार ; बिन आपणि भाषा बलाइये, नि ऊँनि दिलकि बात भ्यार ।' भौत भल रौनकि कार्यक्रम प्रस्तुत करणक लिजी संस्था और सबै कलाकारों/गायकों कैं बधै और शुभकामना ।
पूरन चन्द्र काण्डपाल
25.03.2019
No comments:
Post a Comment