Almora bhasha samelan : अल्मोड़ा भाषा सम्मेलन

[11/13, 8:08 AM] P C Kandpal: कप्तान गजे घले सम्मान

     विक्टोरिया क्रॉस विजेता कप्तान गजे घले कि याद में य सम्मान मिकैं म्येरि किताब "महामनखी" के लिजी राष्ट्रीय कुमाउनी भाषा सम्मेलन में 12 नवम्बर 2018 हुणि प्रदान करिगो । य किताब में 21 परमवीरचक्र और 66 अशोकचक्र विजेताओं कि तीन भाषाओं (कुमाउनी, हिंदी और अंग्रेजी) में चर्चा छ ।

मीठी मीठी - 182 : सफल रौछ अल्मोड़ा राष्ट्रीय कुमाउनी भाषा सम्मेलन

     तीन दिनी नौउं 'राष्ट्रीय कुमाउनी भाषा सम्मेलन' अल्माड़ में 10 बटि 12 नवम्बर 2018 तक कुमाउनी भाषा, साहित्य एवं संस्कृति प्रचार समिति कसारदेवी अल्मोड़ा व 'पहरू' कुमाउनी मासिक पत्रिका द्वारा भौत भली भांत आयोजित करिगो ।  सम्मेलन में देश भर बटि कुमाउनी क रचनाकार और कुमाउनी भाषा प्रेमी लोग ऐ रौछी । यौ मौक पर कएक राजनेता, पत्रकार, साहित्यकार, गणमान्य व्यक्ति और सांस्कृतिक कलाकार लै ऐ रौछी । विशेष बात य छ कि या एक सांध्यकालीन  सत्र में आयोजित कुमाउनी कवि सम्मेलन में 42 कवियोंल काव्य पाठ करौ । रोजाना पैल सत्रक शुरुआत में जयनन्दा लोक कला केन्द्रक कलाकरों द्वारा चंदन बोरा ज्यूक नेतृत्व में स्वागत गीत गै बेर सबै आगन्तुकोंक सम्मान हौछ ।

      सम्मेलन में हमरि भाषा और यैक रचनाकारों संबंधी कएक प्रस्ताव प्रस्ताव लै पास हईं जै में मुख्य छी हमरि भाषा कैं संविधान क आठूं अनुसूची में शामिल करण और देहरादून में ठंड पड़ी भाषा संस्थान कैं पुनर्जीवित करि बेर भाषा और साहित्यकारों क ख़्याल करण । कुमाउनीक प्रचारक लिजी अभियान चलूण और पढ़ण कि संस्कृतिक दी जगूण कि बात लै हैछ ।

       कप्तान गजे घले सम्मान- विक्टोरिया क्रॉस विजेता कप्तान गजे घले कि याद में य सम्मान मिकैं म्येरि किताब "महामनखी" क लिजी राष्ट्रीय कुमाउनी भाषा सम्मेलन अल्माड़ में 12 नवम्बर 2018 हुणि प्रदान करिगो ।

     सम्मेलन में कएक किताबों क लै लोकार्पण हौछ । म्यर कुमाउनी नाटक "सांचि" क लै सम्मेलन में लोकार्पण हौछ । सम्मेलन में कएक रचनाकारों कैं कुमाउनी भाषा क अलग-अलग विधाओं में सम्मानित लै करिगो । कुल मिलै बेर यौ एक भौत भल और सफल सम्मेलन छी । सबै भागीदारोंल आयोजन समिति कि पुरि टीम कैं साधुवाद ज्ञापित करौ । सम्मेलन कैं सफल बनूण में योगदान दिणी लोगों क लै आभार प्रकट करिगो । तीन दिनक कुमाउनी भाषा सम्मेलन ( कुमाउनी भाषा कुम्भ) कि भागीदारीक बाद आज 13.11.2018 हुणि रत्तै वापिस ऐ गोयूं ।

पूरन चन्द्र काण्डपाल
13.11.2017