Kas jamaan aigo : कस जमान ऐगो

खरी खरी - 357 : कस जमान ऐगो

ब्या में बरेतिय लोग सिद
ब्योलि कै घर औंनी,
खै-पी बेर लिफाफ
ब्यौला बाप कैं पकडूंनी,
कै दगै बात करण क
टैम न्हैति बतूनी,
जैमाव डाउण है
पैलिकै खसिकि औंनी,
बरयात कूण में सिरफ
ब्यौल क परिवार वां रैगो,
कौस जमान देखौ
कौस जमान ऐगो ।

ब्या क लगन कि
परवा क्वे नि करन,
वीडियो फोटो वलांक
सब जाग हुकम चलूं,
खिसाई बामण चुपचाप
टकटकी लगै भैरां,
कभतै झपकि ल्युछ
कभतै आंख मिनू,
फोटोग्राफी भलि है गेई
समझो भल ब्या हैगो,
कौस जमान देखौ
कौस जमान ऐगो ।

पूरन चन्द्र काण्डपाल
21.12. 2018