मीठी मीठी - 380 : सफल रौछ नौकुचियाताल राष्ट्रीय कुमाउनी भाषा सम्मेलन - 2019
तीन दिनी इग्यारूं 'राष्ट्रीय कुमाउनी भाषा सम्मेलन' मौनी माई आश्रम, भक्ति धाम, नौकुचियताल (नैनीताल ) में 10 बटि 12 नवम्बर 2019 तक कुमाउनी भाषा, साहित्य एवं संस्कृति प्रचार समिति कसारदेवी अल्मोड़ा व 'पहरू' कुमाउनी मासिक पत्रिका द्वारा भौत भली भांत आयोजित करिगो । सम्मेलन में देश भर बटि कुमाउनी क रचनाकार और कुमाउनी भाषा प्रेमी लोग ऐ रौछी । यौ मौक पर कएक राजनेता, पत्रकार, साहित्यकार, गणमान्य व्यक्ति और सांस्कृतिक कलाकार लै ऐ रौछी । विशेष बात य छ कि या एक सांध्यकालीन सत्र में आयोजित कुमाउनी कवि सम्मेलन में करीब 40 कवियोंल काव्य पाठ करौ । रोजाना पैल सत्रक शुरुआत में जयनन्दा लोक कला केन्द्रक कलाकरों द्वारा चंदन बोरा ज्यूक नेतृत्व में स्वागत गीत गै बेर सबै आगन्तुकोंक सम्मान हौछ ।
सम्मेलन में हमरि भाषा और यैक रचनाकारों संबंधी कएक प्रस्ताव प्रस्ताव लै पास हईं जै में मुख्य छी हमरि भाषा कैं संविधान क आठूं अनुसूची में शामिल करण और देहरादून में ठंड पड़ी भाषा संस्थान कैं पुनर्जीवित करि बेर भाषा और साहित्यकारों क ख़्याल करण । कुमाउनीक प्रचारक लिजी अभियान चलूण और पढ़ण कि संस्कृतिक दी जगूण कि बात लै हैछ ।
सम्मेलन में कएक किताबों क लै लोकार्पण हौछ । म्यरि किताब " हमरि भाषा हमरि पछयाण "(कुमाउनी भाषा सिखलाई) क लै सम्मेलन में लोकार्पण हौछ । सम्मेलन में कएक रचनाकारों कैं कुमाउनी भाषा क अलग-अलग विधाओं में सम्मानित लै करिगो । कुल मिलै बेर यौ एक भौत भल और सफल सम्मेलन छी । सबै भागीदारोंल आयोजन समिति कि पुरि टीम कैं साधुवाद ज्ञापित करौ । सम्मेलन कैं सफल बनूण में योगदान दिणी लोगों क लै आभार प्रकट करिगो ।
पूरन चन्द्र काण्डपाल
13.11.2019
No comments:
Post a Comment